سلومة . . لماذا ؟؟

انا متأكد ان انا مسميتش المدونة دى باسم سلومة الاقرع كدة و خلاص . .

مش اعتباطا يعنى - بالذمة حلوة اعتباطا دى -

بس تقدر تقول ان سلومة ده خيال المآته بتاعنا . .

تمثال خشب و ملبسينه شوية خرق

و معلقينه على خشبة عشان يخوف اللى زيى و زيك . .

اوعى تكون مع الناس التانيين !
سلومة الاقرع ميعرفش اخوه ,

يعنى لو نطقت هايناولك من الآخر ,

بس المشكلة بقى انك ممكن تكون ساكت و فى حالك

و مبتتكلمش و مبتعملش و حتى الجرايد مبتقراهاش ,

و اتخن جرنان ياخد فى ايدك 3 دقايق ,

يا دوب تقرا نص كلمة و حظك اليوم ( اذا كان الاخبار) ,

او تقرا عمود مواقف و الكام نكتة الحيلة (اذا كان الاهرام) ,

و ممكن تكون حضرتك متعرفش اسم النائب اللى بيمثل دايرتك ,

و ممكن تكون عمرك ما دخلت القسم الا مرتين فى حياتك ,

مرة عشان تعمل البطاقة ,

و التانية عشان تعمل بدل فاقد ,

و ممكن تكون راجل راضى و قنوع و مبتعترضش

مع ان المرتب اللى كنت بتاخده سنة 2004 هو هو لسة متغيرش

, وممكن يكون اكبر نشاط سياسى لسعادتك انك تقرا جرنان الدستور . . . .
و مع ذلك بتلاقى سلومة طالعلك من تحت الارض ,

و انت راجع من سهرة على القهوة بعد بولة "ترنيب"

ملهاش حل و سألك فين بطاقتك و فتشك شبه ذاتى ,

او وقفك و انت معدى من احد الشواع الرئيسية

قبل ما الريس يعدى بالموكب بتاعه بحوالى 4 او 5 ساعات و فتش شنطتك بالكامل !!

و ممكن يوصل بيه الكرم لدرجة انه يزوركم فى البيت ,

بيسأل على السيد الوالد

و الست الوالدة تقولله مش موجود نقولله مين ؟؟

و يرد بصوت و بلهجة طبعا كلكم عارفينها

" مش موجود ازاى ده انا سامع صوته . . قوليله يطلع دلوقتى "

" اطلع يا سعيد يا مهران" . . . . . . . . . . . . . . . . . . . الخ

و يطلع كل ده عشان القضية اللى رافعها عليكم الحى بسبب الفتحه اللى فتحتوها للتكييف !!!

هاتروح فين من سلومة ؟؟

مهما اتخفيت عارفينك !!